വിഷകന്യക

ഹേ പ്രപഞ്ച സൃഷ്ടാക്കളെ,

എനിക്കിന്നൊരു വരം വേണം. ..

കാവി പുതക്കാതെ ,കുരിശു ചുമക്കാതെ
 
നിസ്ക്കാരപ്പായ് വിരിക്കാതെ 
,
എനിക്കൊരു വരം വേണം
....
ഞാനൊരാളല്ല,

ഒരായിരം കോടി ആര്‍ത്തനാദങ്ങളുടെ

പ്രതിധ്വനി മാത്രം..


എനിക്കൊരു വരം വേണം
...
ചോരച്ച കണ്ണിലെരിയുന്ന

കാമാഗ്നിയുമായ്‌,

പെണ്ണുടല്‍ തേടി അലയുന്ന

ഇരുകാലികളെ നേരിടാന്‍
 .
പാല്‍മണം മാറാത്ത ചുണ്ടിലും

ഭ്രാന്തന്‍ ദംഷ്ട്രകളിറക്കി
,
ചോരയൂറ്റി മദം കൊണ്ട

പിശാചിനെ നേരിടാന്‍
 .
പെണ്ണിന്‍റെ ചോരയും കണ്ണീരും,

മാംസവും ഇഴുകിപ്പിടിച്ച

നഖങ്ങള്‍ നക്കിത്തോര്‍ത്തി,

ഇര കാത്തിരിക്കുന്ന

ചെന്നായ്ക്കളെ നേരിടാന്‍ 
.
അച്ഛനെന്ന വാക്കിനറപ്പിക്കുന്ന

അര്‍ഥം ചമച്ച കിരാതരെ നേരിടാന്‍.

ഹേ പ്രപഞ്ച സൃഷ്ടാക്കളെ,

എനിക്കിന്നൊരു വരം വേണം
..
കാമത്തിനു ബലിയായ

പിഞ്ചുടലാണെന്നര്‍ച്ചന.

കഴുത്തില്‍ കയര്‍ മുറുകികണ്ണുതുറിച്ച,

വിഷത്താലുള്ളു വെന്ത്‌,

തീയില്‍ പാതി ചുട്ട -

പെണ്ണുടലുകള്‍..
.
ഇനിയുമുണ്ട്...

പിച്ചിച്ചീന്തി,

ചവിട്ടിക്കുഴച്ച് മുറിച്ചു പങ്കിട്ട 
,
പെണ്ണുടലുകള്‍.

ആവോളം കാണുക

ഒടുവില്‍ എനിക്കാ വരം തരൂ .

കാമം ചുരന്ന ,വെറിപൂണ്ട നോട്ടമോ

സ്പര്‍ശമോ വാക്കോ ,ചിന്തകള്‍ തന്നെയോ

സ്ത്രീയുടെ മെയ്യില്‍ പടര്‍ന്നു വിഷമായ്

ഒടുവില്‍ അവളൊരു വിഷകന്യയായ്

സ്വയം രക്ഷ നേടട്ടേ...

ശ്വാസവും ഗന്ധവും സ്പര്‍ശവും ദേഹവും

ഘോര വിഷമയമായ

സ്പര്ശാതീത കന്യക .

ഹേ പ്രപഞ്ച സൃഷ്ടാക്കളെ

ഞാനര്‍ത്ഥിക്കുകയാണ്

എനിക്കീ വരം തരൂ .

ഇനി മേലിലെങ്കിലും

ഞെട്ടിയുണരാതുറങ്ങട്ടെ

പെണ്ണും പെണ്ണിനെ പെറ്റൊരമ്മയും

പെണ്ണിന് കാവലായ്

കണ്ണു പൂട്ടാത്തോരച്ചനുമേട്ടനും...